Быел яз килмәс инде дип уфтанган идек, җәмәгать, менә, рәхим итегез, килеп тә җитте, суга күмеп тә өлгерде ул яз.
Актанышта язгы ташу куркынычын контрольгә алу максатыннан хакимият йортында ничәмә-ничә утырыш үтсә дә, район үзәгендә язгы суга каршы торыру чаралары тиешле дәрәҗәдә әле һаман оештырылмаган.
Су казасын беренчеләрдән булып Юбилей урамындагы 107 йортта яшәүчеләр күрде. Хакимият бинасы артында гына урнашкан әлеге күпфатирлы йортның беренче подъездында яшәүчеләр чаң суга: кар суы подъезд алдындагы мәйданчыкка гына сыеша алмаган — эчкә үк ургылып килеп кергән. Подъезд алдында су тирәнлеге чама белән 30-40 сантимерга җитә.
«Башка елларда кышын ишегалдындагы кар даими эттерелеп, чистартылып торды. Быел исә менә шундый хәл килеп чыкты. Подъездга таба авышлыкның дөрес түгел икәнен күрү өчен белгеч булырга кирәкми. Җәйге яңгыр суы да ишек төбенә җыелып җәфалый», — ди биредә яшәүчеләр.
Подъезд алды тротуарын бу йортта яшәүчеләр салмаган, билгеле. Әлеге хата торак-коммуналь хуҗалыкныкы, тротуар салучыларныкы һәм эшне кабул итеп алучыларныкы. Ни өчен соң гади халык зыян күрергә тиеш?
«Яран» торак милекчеләр ширкәте бу юлы да халык проблемасына «креатив» якын килгән. Ярый ла ширкәт кыш көне кар чистарткан көрәкләрен ерак алып куймаган — алар бүген Юбилей урамы 107 йорт подъездындагы кар суын «КӨРӘҮ» өчен бик тә «уңайлы». Суны җырлый-җырлый көрәрлек, тик менә урам якка көрәкләп чыгарылган су шул ук тизлектә кабат подъездга «ашыга». Ә сез күпфатирлы йортлар өчен җаваплы оешманы халык зарын ишетмәүдә гаеплисез, җәмәгать. Ничек кенә эшлиләр әле! Су көрәгәнне кайчан күрер идегез!
