ФАҖИГА: Актаныш районында эш яшендәге ике ар-атның гомере мунчада өзелгән
24 март көнне Актаныш районының Меңнәр авылында эш яшендәге ике ир-ат мунчада ис тиеп вафат була. Үзәк урамдагы шәхси секторда килеп чыккан фаҗиганең беренчел сәбәбе итеп утын белән ягыла торган мунчада ис газы белән агулануы фаразлана. Вафат булучыларның 56 һәм 53 яшьтә булулары мәгълүм.
Искәртеп үтәбез, ис тию иң куркыныч агулану төре буларак билгеле. Сөрем газының исе дә, төсе дә юк. Гадәттә кешеләр мунчада, гаражда, җилләтү дөрес эшләмәсә, фатирда да ис тиеп һәлак була.
Ис газы белән агулануның беренче билгеләре — косасы килә, баш әйләнә, пульс ешая, тирәлектә ориентация югала.
Ис тию җиңелчә булганда, гадәттә, ул 4-4,5 сәгатьтә бетә. Бу вакытта кешенең сәламәтлеген игътибар белән күзәтеп торырга, кичекмәстән табибка мөрәҗәгать итәргә кирәк.
